Каков таков дијалог

Кога странските дипломати, одмерувајќи ја вината за отсуството на дијалог и не водејќи сметка за аргументите, ставија знак на равенство меѓу власта и опозицијата, на Бранко Црвенковски не му преостана ништо друго освен да го стори она што го направи вчера - да ја исполни единствената обврска на опозицијата за добивање позитивен извештај од Европската комисија.
Црвенковски објави дека прифаќа било каков деловник што ќе го предложи власта. Пратениците на СДСМ ќе се вратат на координациите кај Трајко Вељановски, се договарало нешто важно или не. И конечно, најсилната опозициска партија се откажува од идејата да се формира комисија за контрола како се трошат народните пари, оти без разлика дали се краде или не, тоа со комисија не се решава.
И ете, Македонија конечно ќе добие каков таков политички дијалог. Сега очекувам Никола Груевски да возврати на гестот на Црвенковски и да објави дека владата ќе биде задоволна од било каков извештај од Европската комисија, бидејќи ги исполниле ние критериумите и обврските од Брисел или не, од нас не зависи дали ќе станеме членка на ЕУ и од НАТО, туку од некаква си Грција.
Странските дипломати, какви такви, нека прокнижат еден позитивен поен. Народот, каков таков, нека биде задоволен. А Македонија? Кој во оваа земја се секира за Македонија?