Официјален Париз отпочна „силна офанзива“ за одбрана на францускиот јазик, како јазик на светската дипломатија, спротивставувајќи се на доминацијата на англискиот јазик во Обединетите нации и во Европската унија, пишува „Фајненшл тајмс“.

Лондонскиот весник забележува дека станува збор за нов обид на Франција да го одбрани својот јазик во меѓународните инсистуции и форуми и смета дека оваа дипломатска офанзива е испровоцирана од изборот на британската баронеса Ештон, за нов шеф на дипломатијата на ЕУ.

За поранешниот еврокомесар за трговија и пред тоа неколкугодишен заменик министер во британската влада, Париз смета дека „мошне лошо“ зборува француски, што според француските мислења е „незамисливо“ за некој кој е поставен на вака висока европска функција. Француската страна се плаши дека баронеса Ештон пoради тоа ќе наметне своја и чисто англофонска дипломатија во Брисел и во Унијата.

Француската влада, затоа, го испратила поранешниот премиер Жан-Пјер Рафарен во Њујорк, со задача во Обединетите нации да инсистира да се почитува францускиот јазик како службен и официјален јазик за комуникација во ОН заедно со англискиот, шпанскиот, кинескиот и рускиот.

Лобистот на официјален Париз во седиштето на ЕУ Жак Лафит, меѓутоа, смета дека целата оваа офанзива е сосема непотребна. Во изјава за „Фајненшл тајмс“ Лафит вели дека „англискиот се претвори во латински на современиот свет, јазик што сите го разбираат“. Според неговото мислење „тоа е многу практично, па затоа и не треба да се спротивставува на неговиот успон во светот“.