Собранието на Република Македонија денеска во рамки на новото продолжение на 95-тата седница заклучи дека Предлог-закон за изменување и дополнување на Законот за здравствено осигурување е прифатлив и може да се даде на натамошно читање.
Со измените се разработува начинот на плаќање на здравствените услуги во различните нивоа на здравствена заштита. Се прецизира како се плаќаат здравствените услуги на примарно, секундарно и терцијарно ниво, а се предлага и измена на пристапот за утврдување на референтните цени на лековите.
Се предвидува припадниците на монаштвото и сестринството да не плаќаат здравствено осигурување, бидејќи овие лица не остваруваат никакви приходи. Обврската за плаќање и исплата на придонесот за здравствено осигурување ја презема Фондот за здравствено осигурување.
Се предлагаат измени на основицата за пресметување на надоместокот на плата, односно наместо основица да претставува просекот од исплатена плата во последните шест месеци, се предлага тоа да биде просекот од исплатена плата во последните 12 месеци.
Со Предлог-законот се предвидува договорите што ги склучува Фондот со здравствените установи наместо од 1 јануари до крајот на годината, да траат од 1 април до 31 март наредната година.
Се предлага и бришење на правото на посебен паричен надоместок за живородено дете, по одлуката на Уставниот суд да се изземе ограничувањето на ова право само во регионите со понизок наталитет. Со Предлог измените се утврдува и рок од три години за замена на здравствените легитимации со електронски здравствени картички.
Министерот за здравство Бујар Османи вчера образложувајќи ги измените рече дека тие имаат за цел создавање услови за поефективен и поефикасен здравствен систем во интерес на пациентите.
Собранието продолжува со расправа по Предлогот на закон за изменување и дополнување на Законот за извршување, кој е во прво читање.