Биќе ова земља Вардарска бановина!

Силно ме забавува овој Латас. Онака запенавен, сите ги убедува дека разликата меѓу нас „предавниците“, коишто наводно сме го прифаќале грчкиот предлог за името - кој предлог?! - и премиерот е во тоа што (цитирам) „Груевски прифаќа компромисно решение кое не задира во Уставот, нацијата и јазикот, а води до Европа и НАТО“.
Баш ме интересира кое е тоа компромисно решение. Нашиве другарчиња од Сани Бич велат дека тоа ќе било името „Република Вардарска Македонија“. Бидејќи сме биле навикнати да правиме разлика меѓу „Вардарска“ и „Егејска“. За ова, според грчките медиуми, се воделе преговори „далеку од очите на јавноста“. А нашиот народ вели - далеку од очите, далеку од срцето.
Елем, прашувам јавно - тоа ли е тој „патриотски“ предлог? Може ли некој да ни објасни зошто „Вардарска Македонија“ е подобро решение од „Северна“, од „Нова“ или од „Република Македонија (Скопје)“. Дека не дели на „Вардарци“ и на „Егејци“?
Ако не знаете, јас ќе ви објаснам. Денес ќе се викаме „Вардарска Македонија“, а утре Вардарска - бановина! Јелте, другови патриоти?