Велекорупција

Владата нема трајно да вработи 30.000 привремено ангажирани лица во администрацијата, туку „само“ 5.000. Ова го тврди премиерот Никола Груевски и уште додава дека оваа работа мора да се заврши по налог на Брисел.
Е, тоа веќе е некаква утеха. Брисел, нормално, мора да се слуша. Не мора за името, за Рамковниот договор и за слични дребулии, но мора кога станува збор за удомување на армија млади луѓе, главно партиски војници на Груевски, на државни јасли.
Тие, откако ќе добијат вработување и ќе ја примат првата септемвриска плата, на добрината, нормално, ќе возвратат со – гласање. Тие и нивните најблиски. А што ќе рече на тоа Брисел?
Ништо. Кај нас купувањето гласови со државни вработувања, во време на тешка криза и сеопшта беспарица, се смета за нормална работа. Ние, по обичај, ловиме корупција на ситно. Велекорупцијата е фактор на стабилноста на Македонија.